Fotoen: (c) Bohumil KOSTOHRYZ 

EN AUSGETREPPELTE SCHONG

vum Jean-Paul Maes

mam Nora Koenig a Marc Baum

Regie: Fabio Godinho

 

Leider si mir esou gutt ewéi ausverkaaft, fir eventuell Reschtticketen kënnt Dir Iech op eisem Telefon +352 621 593 619 informéieren.

 


Léif Frënn vum KALEIDOSKOP,

virun eppes méi wéi engem Joer soutze mer op eng Kéier alleguer an enger Zort Quarantäne, am Gaart hunn engem just d’Villecher nach Gesellschaft geleescht.

An ech haat Zäit fir ë neit Stéick ze schreiwen, wat scho méi laang a mir gemautscht huet. Et sollt mäin 18. ginn: d’Geschicht vum Thierry an dem Valérie, enger Koppel an deene beschte Joeren, propper situéiert, zweemol d’Joer an d’Vakanz, alles beschtens … kéint ee méngen.

No enger Vakanz fällt EN AUSGETREPPELTE SCHONG aus dem Thierry sénger Valisse. Wou kënnt deen hier? Watfireng Geschicht stéicht derhannert? Wou wore si iwwerhaapt an der Vakanz?

Beim Schreiwen haat ech mer virgestallt, datt de Marc Baum an d’Nora Koenig déi ideal Besetzung fir mäi Stéick wieren. An et ass mer duerfir eng besonneg Freed si zwee an der Regie vum Fabio Godinho an der Bühn vu séngem Brudder Marco, déi allen zwee grad esou zu deene wichtegsten jonke Künstler zu Lëtzebuerg gehéieren, ze wëssen.

Mir, déi ganz Equipe vum KALEIDOSKOP, géingen eis iwwer äere Besuch am Beetebuerger Schlass freeën. Reservéiert awer w.e.gl., well mer wéinst de Covid-Bestëmmungen nëmmen eng begrenzten Zuel vu Leit eraloosse kënnen.

 

Äeren

 

Jean-Paul Maes